UNICEF: 151 mijë fëmijë në rrezik në Irak

21:01 | 11 Dhjetor 2018
Arbresh Info

UNICEF është angazhuar në një garë kundër kohës në Irak për të ndihmuar 151 mijë fëmijë, viktima të luftërave në Lindjen e Mesme që rrezikojnë sot jetën nga i ftohti.

Këta fëmijë që janë refugjatë të brendshëm të detyruar të braktisin bashkë me familjet e tyre shtëpitë për shkak të luftimeve, tani kërcënohen, me ardhjen e dimrit, nga i ftohti dhe nga përmbytjet që kanë prekur rajone të ndryshme të vendit.

Në fakt, në Irak, dimri është i ashpër dhe i karakterizuar nga shira dhe dëborë e fortë. Në veri, ku jeton pjesa më e madhe e fëmijëve jazidi që janë refugjatë të brendshëm, temperaturat zbresin shumë gradë nën zero, përcjell Atsh.

Mbi të gjitha, përmbytjet shkatërruese e kanë bërë këtë dimër edhe më të ashpër mbi të gjitha për fëmijët që janë të prekur nga hipotermia dhe sëmundjet në frymëmarrje.